جمعرات، 3 دسمبر، 2015

"پی کے " چکھنے سے کُچھ نہیں ہو گا
"پی کے " دیکھو تو پیاس جائے گی
" رانگ نمبر " مِلانے والو سُنو !!
"لوڈ " ایزی کبھی نہیں ہوتا
اپنا " بیلنس " سنبھال کر رکھو !!
۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
اِس دیس کی پیشانی پہ آزاد لِکھا ہے
ہر ٹھیلے پہ زنجیر کے زیور کی صدا ہے


ہر سِمت مَچا شور کہ گُستاخ ہے پکڑو
میں نے تو فقط پُوچھا تھا کیا آج ہوا ہے

...................
عابی مکھنوی
ابھی سردی نہیں آئی !!
ابھی موسم نہیں بھیگا !!
ابھی ماحول بھی دھند میں نہیں ڈوبا
ابھی ناران کی بل کھاتی سڑکو ں پر ہے سناٹا !!
ابھی تو برف کی ڈولی فضاؤں میں معلق ہے
ابھی تو یہ نومبر ہے
نومبر میں تو شاعر اپنی چُھریاں تیز کرتے ہیں
نومبر جانے والا ہے
دسمبر تیری شامت آنے والی ہے !!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
کہا میں نے دسمبر تنگ کرتا ہے
وہ بولا کوئی آتشدان بھیجوں گا

کہا میں نے دسمبر زرد موسم ہے
وہ بولا دافعِ یرقان بھیجوں گا

کہا میں نے دسمبر کتنا پھیکا ہے
وہ بولا جو کہو تو پان بھیجوں گا

کہا میں نے دسمبر کا میں قیدی ہوں
وہ بولا پھر تو میں تاوان بھیجوں گا

کہا میں نے دسمبر کتنا ظالم ہے
وہ بولا اب کوئی انسان بھیجوں گا

کہا میں نے دسمبر میں ہے بزنس ٹھپ
وہ بولا بیچنے ایمان بھیجوں گا

کہا میں نے دسمبر اب نہیں جاتا
وہ بولا ڈھیٹ سا مہمان بھیجوں گا

کہا میں نے دسمبر ہےوفا بھیجو
وہ بولا میں سیاستدان بھیجوں گا

کہا میں نے دسمبر میں انوکھا کچھ
وہ بولا صدرِ پاکستان بھیجوں گا

کہا میں نے دسمبر منجمد سا ہے
وہ بولا اِک نیا بحران بھیجوں گا

کہا میں نے دسمبر بھی قیامت ہے
وہ بولا اب کے میں عمران بھیجوں گا

کہا میں نے دسمبر ہے اور عابی چُپ
وہ بولا پھر تو میں دیوان بھیجوں گا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی

اتوار، 29 نومبر، 2015

مہلت از :عابی مکھنوی

صلی اللہ علیہ وسلم !!!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بیٹھے بیٹھے حشر میں اِک دِن جا پہنچا میں
سارا جُھوٹ اُٹھائے سر پر !!
مکر و دَغا کی ساری چالیں کاندھوں پر !!
پوٹلی میں چند کھوکھلے سجدے !!
ماہ صیام کی بُھوک میں ڈُوبے کھوٹے روزے !!
آنکھوں میں عکس ہائے بُتاں کا پُورا البم ڈول رہا تھا !!
بایاں فرشتہ میرا کھاتہ کھول رہا تھا !!
ٹانگیں تھر تھر کانپ رہی تھیں !!
اَبو امی بہن اور بھائی بیٹا بیٹی بیوی سب میں بُھول چُکا تھا!!
جیسا سُنا تھا !جیسا پڑھا تھا ! حشر ذرا کُچھ اُس سے سِوا تھا !!
سوچ میں گُم تھا اب کیا ہو گا !!
دایاں فرشتہ آلتی پالتی مار کے فارغ بیٹھا تھا
بائیں ہاتھ پہ حدِ نِگاہ تک  دفتر تھا کرتُوتوں کا !!
سوچ میں گُم تھا اَب کیا ہوگا ! کیسے ہو گا ! کیونکر ہو گا ! کون کرے گا !
لمحہ بھر کو ٹھٹکا ! کسی نے نام لیا ہو میرا جیسے !!
شہد سی میٹھی کوئی صدا تھی !!
کانوں میں رَس گھول رہی تھی !!
مُڑ کر دیکھنے والا تھا کہ واپس دُنیا لوٹ آیا
اور اَب بیٹھا سوچ رہا ہوں !!
تھوڑا بوجھ تو ہلکا کر لُوں
شرم و حیا کا دامن تھاموں !!
مُہلت ہے !! اِس دِل کو تھوڑا نہلا دُوں
مُہلت ہے !! چند سِکے ہی اب چمکا لُوں
شہد سے میٹھی کوئی صدا جب اِن کانوں پر دَستک دے تو
کم از کم یہ آنکھیں تو اِس قابل ہوں کہ دیکھ سکوں اُس ہستی کو
جس کی دُعا میں شامل تھا میں !! جس کی دُعا میں شامل ہوں میں !!
جس نے رب سے جب بھی مانگا !! میرا آج اور کل ہی مانگا !!
مُہلت ہے !! اِس دِل کو تھوڑا نہلا دُوں
مُہلت ہے !! چند سِکے ہی اب چمکا لُوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گناہگار اُمتی :عابی مکھنوی

ہفتہ، 17 اکتوبر، 2015

"" غذا کا عالمی دِن ""

آج دُنیا بھر میں




"" غذا کا عالمی دِن "" منایا جا رہا ہے ۔ اسی حوالے سے ایک پُرانی تحریر پیشِ خدمت ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دو تصویریں:
۔۔۔۔۔۔۔۔۔۔۔۔۔۔۔۔۔۔۔۔
تربیتی نشست کے دوران ٹھیک ایک بجے لنچ بریک ہوتی ہے ۔وہ اِسی سال کی اُنتیس جولائی تھی ۔ایک بجے بریک کے بعد جائزہ لیا تو ابھی لنچ شروع ہونے میں پانچ دس منٹ باقی تھے ۔
عجیب قدموں کا ساتھ ہے کہ اکثر خواہ مخواہ کسی سِمت میں چل پڑتے ہیں ۔وقت اور ماحول کے تقاضوں سے انجان قدم !! اُس دِن بھی خواہ مخواہ چُپکے سے ایک سمت چل پڑے۔
زیادہ نہیں چلنا پڑا۔محض چند قدم دُور ہی دیوار کے سائے میں ایک پُراسرار سایہ بیٹھا دِکھائی دیا ۔تھوڑا قریب گیا تو پتا چلا کہ ایک مزدور ہے اور اُس کی بھی لنچ بریک چل رہی ہے ۔وہ ننگی زمین پر بیٹھا تھا ۔ اُس کے دائیں پاؤں کے ساتھ ایک شاپنگ بیگ بچھا ہوا تھا اور اُس شاپر پر اُس دِن کے مینو کے مطابق کھانا دھرا تھا۔
اپنی پیشہ ورانہ زندگی میں دیسی بدیسی شاید ہی کوئی ڈِش ہو گی جو نظر سے نہ گُزری ہو ۔ نیلے کالر سے سفید کالر تک کے سفر میں مُلین سے مُرغن تک ہر بھوجن پر ہاتھ صاف کیا ۔
لیکن وہ ڈِش میرے لیے امتحان بن گئی ۔
چار و نا چار اُس غیر اہم پُرزے کو بھی سلام کرنا پڑا۔
السلام علیکم !!
وعلیکم السلام !!
(عجیب بد تمیز آدمی تھا ۔سلام کا جواب دیتے ہوئے سر بھی نہیں اُٹھایا)
کیا حال ہے بھائی !!
کرم ہے اللہ کا !!
اُس نے لقمہ سلیقے سے توڑتے ہوئے جواب دیا ۔
کیا کھا رہے ہو ؟؟
کھانا کھا رہا ہوں !!
بھائی وہ تو میں بھی دیکھ رہا ہوں کہ کھانا ہی کھا رہے ہو ۔بجری تو بہت دُور پڑی ہے !!
میرا مطلب ہے کہ کھانے میں کیا ہے ؟؟
اُس نے پہلی بار سر اُٹھایا۔ اُس کی آنکھوں میں ہلکی سی نمی تھی لیکن چہرے پر بشاشت ، تازگی اور اعتماد کا راج تھا ۔
پراٹھا ہے اور اُس پر لال مِرچیں ہیں !!
میں پنجوں کے بَل اُس کے پہلو میں بیٹھ گیا ۔
صرف ایک پراٹھا اور اُس پر مِرچیں !!
کیا اِس غذا سے تمھیں اتنی طاقت مِل جاتی ہے جو اِتنی سخت مزدوری کر رہے ہو ؟؟
صاحب یہ خوراک تو بس ایک بہانہ ہے طاقت اور ہمت تو کہیں اور سے آتی ہے ۔
اُف اس قوم کا کیا بنے گا جہاں دیکھو فلسفہ اُبل رہا ہے ۔ میں نے دِل ہی دِل میں سوچا اور ڈائننگ ہال کا رُخ کیا کہ صبح گھر سے ناشتہ کیے بغیر نکلا تھا اور مزید تاخیر سے سنگین نتائج برآمد ہو سکتے تھے ۔
لنچ باکس میں پانچ کے قریب آئٹم تھے اور تمام ہی میرے من پسند ۔شاید وہ پہلا لمحہ ہی تھا جب مُجھے اُس کا خیال آیا کہ لنچ باکس لے کر اُس کے پاس چلا جاتا ہوں اور اکھٹے لنچ کر لیتے ہیں ۔اگلے ہی لمحے خیال آیا کہ کون سے میرے فیس بُک فین یہ سب دیکھ رہے ہیں اور ویسے بھی کہانی تو مُجھے مِل ہی چُکی ہے ۔
لیکن وہ جو اُسے ایک روٹی پر لگی نِری مرچوں سے طاقت اور ہمت دیتا ہے ،اُس کے ہاں ابھی کہانی ادھوری تھی ۔
شام چار بجے چھٹی کے بعد سوچا ایک "تاہ " اور کرتا چلوں ۔
وہ اپنے اوزار سمیٹ رہا تھا۔
ایک کونے میں پوزیشن لیتے ہوئے میں نے پُوچھا چُھٹی کر رہے ہو ؟؟
نہیں !! اگلے دِن کی چال بنا رہا ہوں ۔
پاس ہی دیوار کے ایک کھانچے پر اُس کے دِن کے لنچ سے بچا ایک پراٹھے کا ٹکڑا پڑا تھا جس پر درمیانی جسامت والے کالے چیونٹوں نے دھاوا بول رکھا تھا ۔
بے اختیار میرے چہرے پر مُسکراہٹ پھیل گئی ۔ بڑا فلسفہ بگھار رہا تھا ۔ آخر ہمت جواب دے گئی ہو گی ۔نری مرچیں اور وہ بھی لال !! بھلا کوئی انسان کھا سکتا ہے ؟؟
ناراض نہ ہونا ایک بات کہوں ؟؟
جی صاحب اُس نے دوستانہ انداز میں مُسکراتے ہوئے جواب دیا ۔
وہ بھلے نری مرچ ہی کیوں نہ ہو یا سادہ کچا پکا پراٹھا !! بہرحال رزق ہے اور رزق کی بے حرمتی اللہ کو سخت نا پسند ہے ۔تمھیں پُورا کھانا چاہیے تھا۔
جی صاحب پُورے سے بھی زیادہ کی بُھوک تھی لیکن یہ کالے چیونٹے آپ دیکھ رہے ہیں نا !! اِن میں سے دو پراٹھے پر چڑھ آئے تھے۔ میں نے دو لقمے اِن کے لیے دیوار کے ساتھ ڈال دیے ۔سُنا ہے رِزق بانٹنے سے بڑھتا ہے ۔ اور جو رزق اللہ نے میرے نصیب میں لکھ رکھا ہے وہ میں آپ کو تو پیش کر نہیں سکتا تھا لہذا اللہ نے اِن چیونٹوں کو بھیج دیا ۔ سو وہ اپنا حصہ کھا رہے ہیں ۔
میرے معدے میں موجود پانچوں فاسٹ فوڈ آئٹم ہنسنے لگے !!
اور اُن کے بے مہار قہقہوں سے میرے پیٹ میں شدید مروڑ اُٹھنے لگے۔
یہ کوئی افسانہ نہیں اور نہ ہی گھڑی ہوئی کہانی ہے ۔ محض پانچ دِن پُرانا واقعہ ہے ۔ جن گلیوں سے گزر کر میں روزانہ آتا جاتا ہوں وہاں موجود گھروں کے باہر موجود کیاریوں میں بعض ایسے پودے بھی ہیں جن کی قیمت کا آغاز ہی دو لاکھ سے ہوتا ہے ۔ وہاں گلیوں میں ایسے کُتے ٹہلائے جا رہے ہوتے ہیں کہ جن کی غذا ولایت سے درآمد ہوتی ہے ۔
میں نے اُس کا شکریہ ادا کیا ۔ سادہ آدمی تھا ہونقوں کی طرح تکے جا رہا تھا کہ کس بات کا شکریہ ۔اُسے کیا پتا تھا کہ میں اپنی زندگی میں آنے والے امیر ترین آدمی سے مِل کر جا رہا تھا کہ جس نے میری نظر میں امیر غریب کی تعریف ہی بدل دی تھی ۔جی ہاں عمل کی دُنیا میں پہلی بار دیکھا تھا کہ بانٹنے والے امیر ہوتے ہیں اور جمع کر کر کے گاڑنے والے مُفلس ، غریب اور بے چارے !!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی

جمعہ، 9 اکتوبر، 2015

مزدور ۔۔۔۔۔۔۔۔۔۔
۔۔۔۔۔۔۔۔۔
 
وہ روڈ پہ چلتی گاڑی ہو
یا خواب نگر کا بنگلہ ہو
گاڑی میں لگے ہر پُرزے میں
ہے عکس تِری پیشانی کا
بنگلے میں چُنی سب اینٹوں میں
یہ خُوشبو تیرے خُون کی ہے
یہ رونق سب بازاروں کی
تُو ہے تو ہے مزدور مِرے
وہ اُجلے کپڑوں والے ہوں
وہ ڈاکو یا رکھوالے ہوں
سب راجکماروں کی جنت
جِن ہاتھوں سے تعمیر ہوئی
وہ ہاتھ لکیریں کھو بیٹھے
اے دست شناسو !! بتلاؤ
جو ہاتھ لکیریں کھو بیٹھے
پھر اُن کی قسمت کیا ہو گی
جو سب کو جنت دیتے ہیں
وہ دوزخ میں کیوں جلتے ہیں
کیوں بھوکے ننگے مرتے ہیں
اے دست شناسو !!! بتلاؤ
اے دست شناسو !!! بتلاؤ
عابی مکھنوی
اِس ﭘﺎﮎ ﻭﻃﻦ ﮐﯽ ﻗﺴﻤﺖ ﻣﯿﮟ ﻟﮑﮭﺎ ﮨﮯ ﭼﻤﮑﻨﺎ ﭼﻤﮑﮯ ﮔﺎ
ﺗﻢ ﻻﮐﮫ ﺳﻮﯾﺮﮮ ﻗﺘﻞ ﮐﺮﻭ یہ ﭼﺎﻧﺪ ﻓﻠﮏ ﭘﮧ ﺩﻣﮑﮯ ﮔﺎ
ﺗﻢ ﺭﻭﺯ ﺳﺘﻢ ﺍﯾﺠﺎﺩ ﮐﺮﻭ ﯾﮧ ﻏﻨﭽﮧ ﺯﺭﺩ ﻧﮩﯿﮟ ﮨﻮ ﮔﺎ
ﯾﮧ ﺁﻧﭻ ﺑﮭﮍﮐﺘﯽ ﺟﺎﺋﮯ ﮔﯽ ﯾﮧ ﺷﻌﻠﮧ ﺳﺮﺩ ﻧﮩﯿﮟ ﮨﻮ ﮔﺎ
ﺷﮩﺒﺎﺯ ﺑﮭﻼ ﮐﺐ ﺟﮭﮑﺘﮯ ﮨﯿﮟ ﯾﮧ ﮐﺮﮔﺲ ﮨﯿﮟ ﺟﻮ ﻟﯿﭩﮯ ﮨﯿﮟ
ﺍﺱ ﺩﮬﺮﺗﯽ ﮐﯽ ﺗﻮ ﮐﻞ ﭘﻮﻧﺠﯽ ﭼﻨﺪ ﻏﺎﺯﯼ ﮨﯿﮟ ﮐﭽﮫ ﺑﯿﭩﮯ ﮨﯿﮟ
ﺟﻮ ﮐﺮﺗﮯ ﮨﻮ ﺳﺐ ﯾﺎﺩ ﺭﮐﮭﻮ ﮨﻢ ﮔﻦ ﮐﺮ ﺑﺪﻟﮧ ﻟﯿﺘﮯ ﮨﯿﮟ
ﮨﻢ ﻟﻮﮒ ﺍﺻﻮﻟﻮﮞ ﻭﺍﻟﮯ ﮨﯿﮟ ﺟﻮ ﻣﻠﺘﺎ ﮨﮯ ﻭﮦ ﺩﯾﺘﮯ ﮨﯿﮟ
ﮨﻢ ﮨﻠﮑﮯ ﮨﺎﺗﮫ ﺳﮯ ﺑﺮﭘﺎ ﮨﯿﮟ ﮨﻢ ﺑﮕﮍﯾﮟ ﺗﻮ ﯾﻠﻐﺎﺭ ﺑﮭﯽ ﮨﯿﮟ
ﺟﺐ ﮐﻮﺋﯽ ﻧﺸﺎﻧﮯ ﭘﺮ ﺁﺋﮯ ﮨﻢ ﺗﯿﺮ ﺑﮭﯽ ﮨﯿﮟ ﺗﻠﻮﺍﺭ ﺑﮭﯽ ﮨﯿﮟ
ﻣﺖ ﮈﮬﻮﻧﮉ ﮨﻤﯿﮟ ﺻﺤﺮﺍﺅﮞ ﻣﯿﮟ ﮨﻢ ﺳﺎت ﺳﻤﻨﺪﺭ ﭘﺎﺭ ﺑﮭﯽ ﮨﯿﮟ
ﮨﻢ ﮨﻠﮑﮯ ﮨﺎﺗﮫ ﺳﮯ ﺑﺮﭘﺎ ﮨﯿﮟ
ﮨﻢ ﺑﮕﮍﯾﮟ ﺗﻮ ﯾﻠﻐﺎﺭ ﺑﮭﯽ ﮨﯿﮟ
ﮨﻢ ﺑﮕﮍﯾﮟ ﺗﻮ ﯾﻠﻐﺎﺭ ﺑﮭﯽ ﮨﯿﮟ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
اپنا پنجرہ سجا لیا میں نے
جشن ایسے منا لیا میں نے

ایک گاڑی جلا کےآتے ہی
ایک پرچم اُٹھا لیا میں نے

ایک بھائی کو مار ڈالا ہے
ایک بھائی بنا لیا میں نے

یوں گزرتا ہے یومِ آزادی
جو بچا وہ جلا لیا میں نے

زندہ ہوتے تو جاگتے عابی
شور کتنا مچا لیا میں نے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
فلک سے اُتری صدا کو سمجھو یہیں کہیں ہے وہ صبح ِ روشن
اُٹھو کہ توڑیں غُرورِ ِ ظُلمت اُٹھو کہ شب کو زوال بخشیں

اُٹھو کہ سچ کو جہاں میں بوئیں اُٹھو کہ راہِ وفا ہے سُونی
لپٹ کے قدموں سے روئے منزل جُنوں کو ایسا کمال بخشیں
.....................
عابی مکھنوی
خودی کا فلسفہ سن کر دعائیں کانپ اٹھتی ہیں
چراغ دل کی حدت سے ہوائیں کانپ اٹھتی ہیں

سلاخیں اپنے زنداں کی ذرا مضبوط رکھنا تم
کہ شاہیں پھڑپھڑائے تو فضائیں کانپ اٹھتی ہیں

ہمیں مصلوب کرکے بھی بہت مایوس ہوگے تم
ہماری مسکراہٹ پر سزائیں کانپ اٹھتی ہیں
۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
ابھی سے سُود و زیاں ہے کیسا ابھی تو ادنٰی سی اِبتدا ہے
ابھی سے رَستے بَدل رہے ہو ابھی تو ذِکرِ وفا ہوا ہے

ابھی نہ ہارو !! ابھی نہ بِکھرو !! ابھی ہے روشن چراغ دِل کا
ابھی رگوں میں لہو ہے باقی ابھی تو گُلشن ہرا بھرا ہے

ابھی یہ تمغے سنبھال رکھو ابھی تو باقی ہیں کٹنے والے
ابھی تو بازی جمے گی عابی ابھی تو مقتل کا دَر کُھلا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
یہ تیرا ہے وہ میرا ہے ۔ ۔ ۔ ۔ایک بدن کے اِتنے ٹکڑے !! ۔ ۔ تیرے ہاتھوں میں مرتا ہوں ۔ ۔ ۔ میرے ہاتھوں تُو مرتا ہے ۔ ۔ ۔ ہر کتبے پر لفظ " شہادت " لِکھا ہے ۔ ۔ ۔ کورٹ کچہری تھانے شانے ۔ ۔ ۔ مکڑی ہے اور جال سُنہرے ۔ ۔ ۔ ہر جا ہر سُو پھندے عابی ۔ ۔ ۔ٹیڑھے ترازو عدل کے ڈنکے ۔ ۔ ۔ تُو جھوٹا ہے میں بھی جھوٹا ۔ ۔ ۔ دِل کی دِل میں رکھ کر جینا مجبوری ہے !
تُو بھی بیٹا میں بھی بیٹا ۔ ۔ ۔ سانجھی ماں کی سیل لگا کر بیٹھے ہیں ۔ ۔ ۔
اور دُکاں کا نام " سیاست "رکھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی
روز سہتی ہیں جو کوٹھوں پہ ہوس کے نشتر
ہم درندے جو نہ ہوتے تو وہ مائیں ہوتیں
.................
عابی مکھنوی
مسلسل جن کو کھرچے جا رہے ہیں
وہ سارے زخم بھرتے جا رہے ہیں

مسافر ہیں سفر سے کیا پریشانی
ہمیں چلنا ہے چلتے جا رہے ہیں

یہ دیکھو پھول تو گَل سڑ گئے ہیں
وہ دیکھو سنگ مہکے جا رہے ہیں

ہماری شاعری میں دَم نہیں ہے
تو پھر کیوں آپ بہکے جارہے ہیں

تمھاری تو حفاظت ہو رہی ہے
ہمارے بچے سہمے جا رہے ہیں

برابر پردے ڈالے جارہے ہیں
برابر ننگے ہوتے جا رہے ہیں

سُنا ہے سچ بھی بِکنے لگ گیا ہے
جبھی تو آپ چہکے جا رہے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی

LinkWithin

Related Posts Plugin for WordPress, Blogger...