سُنا ہے.....

 

سنا ہے کوئلے کی کان سے ہیرا نِکلتا ہے

 اُٹھو تاریک راتوں سے کوئی سُورج نکالیں ہم

 عابی مکھنوی

آج تُو جیت گیا اور میں ہاری سب کُچھ

موت نے دار پہ لٹکے ہوئے قیدی سے کہا

آج تُو جیت گیا اور میں ہاری سب کُچھ

بانکپن دیکھ کہ بولا یہ بھنور بھی عابی

دُوبنے والے تِری شان پہ واری سب کچھ

عابی مکھنوی

مہینے سب برابر ہیں محبت کے فقیروں پر

اُترتا ہے سلیقے سے یہ جذبہ بھی امیروں پر

دسمبر ایک فیشن ہے سجاوٹ کے جزیروں پر

کسی رشتے کا کیا رشتہ بدلتے اس کیلنڈر سے

مہینے سب برابر ہیں محبت کے فقیروں پر

عابی مکھنوی

اماں جانی

۔۔۔۔۔۔۔۔ اماں جانی ۔۔۔۔۔

نہ جانے کتنے برسوں سے

دبا ہوں میں شکنجے میں

مہینے دھوپ چھاؤں سے

کبھی یہ چار ہفتوں کے

کبھی کچھ چار سے اوپر

شروع کے دو جو ہفتے ہیں

بہت رنگین ہوتے ہیں

نوابی سے فقیری کا

زمانہ ہر مہینے میں

ہمیشہ ساتھ چلتا ہے

دعائیں ماں کی ہوتی ہیں

پسینہ میں بہاتا ہوں

خدا بھی مسکرا کے پھر

مرے حصے کے دانوں کو

مجھے عزت سے دیتا ہے

یہ قصہ ہے مہینے کے

تڑپتے چوتھے ہفتے کا

مری ماں نے محبت سے

سجایا ناشتہ اک دن

میں اپنی جیب میں باقی

بچے پیسوں کو گننے میں

لگا تھا کہ کہا ماں نے

ارے بیٹا مجھے جاتے

ہوئے تم سو روپے دینا

مرے اندر تو لاوا تھا

کہ ہفتہ آخری تھا یہ

تھے جیبوں میں فقط سکے

بھڑک کر میں یوں بولا ماں

نہ جانے کتنے برسوں سے

ہمیشہ چوتھے ہفتے ہی

مجھے تو کیوں ستاتی ہے

کہ پہلے دونوں ہفتوں میں

بچت کا فلسفہ تیری

زباں پر راج کرتا ہے

کبھی پیسے نہیں مانگے

ہمیشہ آخری ہفتے

تجھے سب یاد آتا ہے

مرے رب ماں کا سایہ تو

سبھی کے سر پہ رکھ قائم

مرے لہجے کی تلخی کو

پیا اس نے محبت سے

عجب مسکان چہرے پہ

عجب سا پیار آنکھوں میں

سجائے نکلی کمرے سے

ذرا سی دیر میں لوٹی

تو ہاتھوں میں تھی اک تھیلی

مرے بچے یہ تیرے ہیں

تری میلی قمیصوں سے

جو سکے مجھ کو ملتے تھے

وہ اس میں ہیں

ہمیشہ چوتھے ہفتے میں

جو سو کا نوٹ لیتی تھی

وہ اس میں ہے

کہ پچھلے بارہ سالوں میں

تری محنت پسینے کے

جو قطرے میں نے جوڑے ہیں

وہ سوکھے تو نہیں بیٹا

یہ پندرہ ہیں یا سولہ ہیں

مگر ہیں یہ ہزاروں میں

ذرا سا مسکرا دے نا

کہ مجھ سے چوتھے ہفتے میں

ترے چہرے کی ویرانی

کبھی دیکھی نہیں جاتی

ذرا سا مسکرا دے نا

مری جاں مسکرا دے ناں

عابی مکھنوی

سوکھی غیرت کا ہم نے کیا کرنا

بجٹ 

آئے کوئی خریدنے آئے 

عافیائوں کی لاٹ رکھی ہے 

چند کانسی ہیں مال خانے میں 

سرخ گورے قبائلی بچے 

کھیلتے ہیں ہماری گلیوں میں 

ان کے ہاتھوں کےدام بتلاؤ 

ان کی ٹانگیں خرید لو ہم سے 

ان کے ماتھوں پہ مار دو گولے

کہ خزانے میں کچھ نہیں باقی 

ملک و ملت کی بہتری کے لیے 

جو بچا ہے وہ بیچنا ہے ہمیں 

اس بجٹ میں تو کچھ نہیں ہو گا 

سوکھی غیرت کا ہم نے کیا کرنا 

تھوڑے ڈالر ملیں تو بات بنے 

تھوڑی غیرت بکے تو کام چلے 

عابی مکھنوی 

ہر آنکھ میرے شہر میں

سنا ہے منفی منفی سے ہمیشہ دور رہتا ہے

نہ جانے بیج کیسے تھے اگی ہیں ہر طرف لاشیں

جس دن تو نے مڑ کر دیکھا

میری لاشیں سستی کیوں ہیں؟

اڑانیں ترک کیا کرنی اجی صیاد کے ڈر سے

مجھے بھی شوق کھونے کا

جب غریب لوگوں کے خواب جل کے مرتے ہیں

۔ ۔ ۔ ۔ ۔ ۔ ۔ ہڑتال ۔ ۔ ۔ ۔ ۔

جب غریب لوگوں کے

خواب جل کے مرتے ہیں

میڈیا اچھلتا ہے

گنتیوں پہ لاشوں کی

جس قدر بھڑکتی ہے

آگ یہ ۔ ۔ تھرکتا ہیں

ایک ایک میت پہ

اشتہار مِلتے ہیں

زر زمیں کے بھوکے بھی

بَن کے ٹھن کے آتے ہیں

بے نِشاں جنازوں میں

حاضری لگاتے ہیں

شاعروں ادیبوں کی

لاٹری نکلتی ہے

ایک ایک آنسو پہ

 فن کو آزماتے ہیں

 جب غریب لوگوں کے

خواب جل کے مرتے ہیں

راکھ اُن کے خوابوں کی

بے حسی کے کھیتوں میں

نوٹ بن کے اُگتی ہے

جب غریب لوگوں کے

خواب جل کے مرتے ہیں

جب غریب لوگوں کے

خواب جل کے مرتے ہیں

۔۔۔۔۔۔۔۔۔۔۔۔۔۔۔۔۔۔۔

عابی مکھنوی