سورج

سُنا ہے کوئلے کی کان سے ہیرا نِکلتا ہے اُٹھو تاریک راتوں سے کوئی سُورج نکالیں ہم عابی مکھنوی

بے حیا کہیں کی !!!!

ہزار بار سمجھایا ۔ ۔ ۔ اپنے اسٹیٹس پر ۔ ۔ ۔ مختلف گروپس میں جا کر ۔ ۔ ۔اللہ کی بندیو !!! فیس بُک تصویریں شائع کرنے کی جگہ نہیں ۔ ۔ کیوں اپنی باوقار ہستی کو ایلی میلی نظروں کی خوراک بناتی ہو ؟؟؟ لیکن یہ لڑکیاں باز نہیں آتیں ۔ ۔کبھی کور فوٹو بدل رہا ہے تو کبھی پروفائل پر جلوے دِکھائے جا رہے ہیں ۔ ۔ ۔ حیا کے فروغ کے لیے جتنا مُمکن ہے وہ میں کر رہا ہوں اور کرتا رہوں گا مثلاً جب بھی فرینڈ لِسٹ میں موجود کوئی خاتون اپنی تصویر کور یا پروفائل میں لگاتی ہے میں فوراً اُس پر کلِک کرتا ہوں کیونکہ نیوز فِیڈ میں تصویر چھوٹی نظر آتی ہے !!!! وقت ہو تو پروفائل اور کور فوٹو کا پُورا البم چیک کرتا ہوں تا کہ پتا چلے پُرانی ڈیلیٹ کی ہیں یا وہیں پڑی ہیں ۔ لیکن افسوس صد افسوس جو ذرہ برابر احساس جاگا ہوں ۔ لیکن میں بھی ہمت نہیں ہارا ۔ ۔ ۔ برابر نظر رکھی ہوئی ہے کبھی تو سُدھریں گی ۔
....................
از: عابی مکھنوی aabi makhnavi

بول

"بول"
۔۔۔۔۔۔۔۔۔
"بول" نام رکھنے سے
جھوٹ کے اماموں کو
سُولیوں کے موسم میں
بولنا نہیں آتا
سونے کے ترازو میں
زر خرید لوگوں کو
عدل کے اُصولوں پر
تولنا نہیں آتا
"بول" سے تو اچھا تھا
"بولی" نام رکھتے تُم
بولیاں لگاتے ہو
میڈیا کی منڈی میں
کھنکھناتے سِکوں پر
جھوٹ رقص کرتا ہے
کھوٹ کی تجارت ہے
زر زمیں کے بُھوکے سب
دو ٹکوں کی لالچ میں
نظریے بدلتے ہیں
اِس لیے گزارش ہے
"بول" نام رکھنے سے
جھوٹ کے اماموں کو
سُولیوں کے موسم میں
بولنا نہیں آتا
سونے کے ترازو میں
زر خرید لوگوں کو
عدل کے اُصولوں پر
تولنا نہیں آتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی

بحضور اقبال ۔۔۔بسلسلہ یوم اقبال

تِری قبرِ مبارک پہ ۔ ۔ ۔

تِرے یومِ ولادت پہ ۔ ۔ ۔

قطاروں میں کھڑے کرگس

خِرد کو پُوجنے والے

جنوں سے بھاگنے والے

سسکتے چیختے پھولوں کی اِک چادر چڑھائیں گے

تِرے افکار کی ضَو کو نفاست سے چھپائیں گے

یہاں پر خاص موقعوں پر سبھی کچھ عام ہوتا ہے

یہاں پر خاص لوگوں کا یہی انجام ہوتا ہے

یہاں پر خاص لوگوں کا یہی انجام ہوتا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عابی مکھنوی

یومِ اقبال :عابی مکھنوی

ایک سوال بحضور اقبال ۔۔۔بسلسلہ یوم اقبال

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جگر کا خُوں پلا کے تم نے بنیادیں رکھی تھیں کیوں

اِک ایسے آشیانے کی ۔۔۔۔

کہ جس کے سب مکینوں کو سلاسل میں ہی پلنا تھا

کہ جس کے صحن میں تازہ گُلابوں کو پگھلنا تھا

نہ شاہیں پھڑپھڑاتے ہیں ۔۔۔

نہ تارے جگمگاتے ہیں ۔۔۔۔

نہ سایہ لا الٰہ کا ہے

نہ سکہ مصطفےٰ ﷺ کا ہے

خُودی دَر دَر بھٹکتی ہے

مسلمانی سسکتی ہے

اگر وہ خواب سچا تھا تو یہ تعبیر کیسی ہے ؟؟؟؟

اگر معمار مُخلص تھے تو یہ تعمیر کیسی ہے ؟؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

عابی مکھنوی

https://www.facebook.com/Aabi.Makhnavi

اے دست شناسو !!! بتلاؤ

اے دست شناسو !!! بتلاؤ
عالمی یوم مزدور یکم مئی 2014
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ روڈ پہ چلتی گاڑی ہو
یا خواب نگر کا بنگلہ ہو
گاڑی میں لگے ہر پُرزے میں
ہے عکس تِری پیشانی کا
بنگلے میں چُنی سب اینٹوں میں
یہ خُوشبو تیرے خُون کی ہے
یہ رونق سب بازاروں کی
تُو ہے تو ہے مزدور مِرے
وہ اُجلے کپڑوں والے ہوں
وہ ڈاکو یا رکھوالے ہوں
سب راجکماروں کی جنت
جِن ہاتھوں سے تعمیر ہوئی
وہ ہاتھ لکیریں کھو بیٹھے
اے دست شناسو !! بتلاؤ
جو ہاتھ لکیریں کھو بیٹھے
پھر اُن کی قسمت کیا ہو گی
جو سب کو جنت دیتے ہیں
وہ دوزخ میں کیوں جلتے ہیں
کیوں بھوکے ننگے مرتے ہیں
اے دست شناسو !!! بتلاؤ
اے دست شناسو !!! بتلاؤ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عابی مکھنوی

مزدور کی عید

یکم مئی ۔۔۔۔ یوم مزدور """ مزدور کی عید ""
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چار جوڑے کپڑوں کے
چار جوڑے جوتوں کے
تھوڑی چینی تھیلی میں
ایک پیکٹ کھیر کا
ایک ڈبہ دودھ کا
دس یا بیس والی ہو
ایک گڈی نوٹوں کی
کل وزن بتاؤ تو
کتنا ان کا بنتا ہے
ہلکے پھلکے تھیلے میں
ڈال دو تو آئے گا
جس قدر یہ ساماں ہے
اگلے پچھلے خرچوں کو
آگے پیچھے کر کے بھی
تھیلا چار چیزوں کا
مجھ سے بھر نہیں پاتا
عید جیسے ہوتی ہے
ویسے کر نہیں پاتا
روز جو اٹھاتا ہوں
بوجھ وہ ٹنوں میں ہے
تھیلا چار چیزوں کا
میں اٹھا نہیں پاتا
پہلی بار دیکھا ہے
غم تو ہلکے ہوتے ہیں
خوشیاں بھاری ہوتی ہیں
خوشیاں بھاری ہوتی ہیں
:::::::::::::::::::::::::::::
عابی مکھنوی

یکم مئی۔۔۔۔یومِ مزدور

کسی رنگ ساز کی ماں نے کہا بیٹا اُٹھو نا۔۔ ناشتہ کرلو
کہ قسمت میں لِکھے دانوں کو چُگنے کے لئے بیٹا
پرندے گھونسلوں سے اُڑ چکے ہیں تم بھی اُٹھ جاؤ
خُمارِ نیند میں ڈُوبا ہوا بیٹا تڑپ اُٹھا
ارے ماں آج چُھٹی ہے ذرا سی دیر سونے دے
مِر ی آنکھوں کے تارے کون سی چُھٹی بتا مُجھ کو۔۔؟؟
ارے ماں!! آج دُنیا بھر میں مزدوروں کا چرچا ہے
میں پچھلے سال بھی گھنٹوں برش لے کر تو بیٹھا تھا
کوئی بھی آج کے دِن ہم کو مزدوری نہیں دیتا
میں پیدل چل کے چورنگی پہ جا بیٹھوں گا لیکن ماں!!
تِرے تو عِلم میں ہو گا کہ پیدل چلنے پِھرنے سے
تِرے اِس لال کو اے ماں غضب کی بھوک لگتی ہے
تو بہتر ہے مُجھے تُو ناشتہ کُچھ دیر سے دے دے
صبح دِن رات کے ہم تین کھانے روز کھاتے ہیں
جو آٹا دِن کی روٹی کا بچے گا رات کھا لیں گے
یہ مزدوروں کا دِن ہے اِس پہ مزدوری نہیں مِلتی
ذرا سی دیر سونے دے مُجھے بھی دِن منانے دے!!!!
 
۔۔۔۔۔عابی مکھنوی۔۔۔۔

تھر ۔۔ اللہ کی قدرت کا شاہکار

تھر ۔۔ اللہ کی قدرت کا شاہکار

میں جب بیکار لمحوں کی
تھکاوٹ سے کبھی تھک کر
کہیں گِرنے کو ہوتا ہوں
تو رب میرا مِری آنکھوں کے آگے پھر
کسی صحرا کا جلتا تپتا موسم بھیج کر بے جان جسم و جاں کو تازہ دم سا کر کے
مجھے پھر سے اُٹھاتا ہے
ہوا لُو جیسی ہو بھی تو
صبا جیسی وہ لگتی ہے
سفر کٹتے ہیں پل بھر میں
تھکاوٹ روٹھ جاتی ہے
پھٹے میلے سے کپڑوں میں
مقید من کے سچے اور اُجلے دل کے مالک
کچی گلیوں کے وہ باسی
جن سے مل کر میں نے سیکھا ہے
خدا کی رحمتیں اُس کے غضب پہ بھاری ہوتی ہیں
جہاں بارش نہیں ہوتی وہاں بھی ہے وہی رازق
جہاں سبزہ نہیں اُگتا وہاں بھی لوگ جیتے ہیں
یہ اُس کی حکمتیں ہیں وہ جہاں چاہے بساتا ہے
اُسی کے بس میں ہے عابی اُسی کو بس یہ بھاتا ہے
قسم لے لو اکیلا ہے جو بِن مانگے کھِلاتا ہے
وہ بِن مانگے کھِلاتا ہے
وہ بِن مانگے کھِلاتا ہے

عابی مکھنوی

میں ظلمت کا جنازہ دیکھ آیا ہوں

تجھے فرصت نہیں ہے رونے دھونے سے
میں ظلمت کا جنازہ دیکھ آیا ہوں

ہوا کا زور چلتا تو کہاں رہتا
دیے کو میں دوبارہ دیکھ آیا ہوں

عابی مکھنوی

عمر (رضی اللہ عنہ) اب کیوں نہیں آتا

عمر)رضی اللہ عنہ(اب کیوں نہیں آتا

شاعر: عابی مکھنوی

بیاد ”سیدنا عمرفاروق رضی اللہ عنہ “

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میں آنکھیں جو ذرا کھولوں

کلیجہ منہ کو آتا ہے

سڑک پر سرد راتوں میں

پڑے ہیں برف سے بچے

دسمبر لوٹ آیا ہے

عمر (رض)اب بھی نہیں آیا

کسی کی بے رِدا بیٹی

لہو میں ڈوب کر بولی

کوئی پہرہ نہیں دیتا

مِری تاریک گلیوں میں

میں سب کچھ ہار بیٹھی ہوں

درندوں کی حکومت میں

عمر (رض) اب بھی نہیں آیا

ذرا آگے کوئی ماں تھی

مُخاطب یُوں خُدا سے وہ

مِرے آنگن میں برسوں سے

فقط فاقہ ہی پلتا ہے

کوئی آہیں نہیں سُنتا

مِرے بے تاب بچوں کی

میں دروازے پہ دَستک کو

زمانے سے ترستی ہوں

عمر (رض) اب کیوں نہیں آتا

عمر (رض) اب کیوں نہیں آتا

میں آنکھیں جو ذرا کھولوں

کلیجہ منہ کو آتا ہے

::::::::::::عابی مکھنوی :::::::::::::